SALATXO ABESBATZA
IGOR ARROYO
SALATXO ABESBATZA Orion sortu zen, 1993ko Santa Zezilia egunean. Hasieratik, adin ezberdinetako pertsonak igaro dira taldetik, eta sorrerako abeslari askok taldean jarraitzen dute gaur egun ere.
Bere ibilbidean zehar, abesbatzak hiru zuzendari izan ditu: Marina Lertxundi, Idoia Asurmendi eta Igor Arroyo; azken hau da egungo zuzendaria.
Salatxo Abesbatzak Euskal Herriko herri ugaritan abestu du, baita atzerrian ere, besteak beste, Portugalen, Frantzian, Italian (Orio Canavesen) eta Norvegian.
Urtero hartzen du parte Orioko ospakizun nagusietan, meza nagusian zein kalean abestuz herriko bi jai handietan: San Pedroetan (ekainaren 29an) eta San Nikolas jaietan (abenduaren 6an). Horrez gain, bost urtean behin herrian ospatzen den Balearen Egunean ere parte hartzen du.
Aipagarria da 2010ean Euskal Telebistako «Oh, Happy Day» musika-taldeen lehiaketan izan zuen parte-hartzea.
Bere errepertorioan denetariko musika-estiloak biltzen dira: polifonia, folklorea eta soinu-bandak, besteak beste.
EMEBE TXIKI
JAIONE SANTOS
EMEBE Txiki 2023an jaio zen; ekimen hau erabakigarria izan da talentu berriak sortzeko ez ezik, baita etorkizuneko belaunaldientzat bikaintasun musikalaren ondarea ziurtatzeko ere. Jaione Santos Agirreren zuzendaritzapean, talde hau haurrek musikarekiko eta abesbatza-kantuarekiko pasioa aurkitzeko gune bihurtu da.
Haur abesbatza bat baino gehiago, EMEBE Txiki familia handi bat da; bertan, txikienek taldean abesten ikasten dute, ahots-teknika hobetzen dute eta, batez ere, musikaz gozatzen dute. Elkarrekin entseatzen dute, ondo pasatzen dute eta elkarrekin hazten doaz, arlo musikalean zein pertsonalean.
Proiektu honi esker, gazteek kantu koralaren munduan murgiltzeko aukera dute adin goiztiarretik, euren entzumena, adierazkortasuna eta musikarekiko maitasuna garatuz. Gainera, pixkanaka, batzuek abesbatza nagusira egingo dute jauzi, kantuarekiko pasioak urte askoan bizirik jarrai dezan ziurtatuz.
ERESARGI TXIKI
KLARA MENDIZABAL
Jarraipena emango zion proiektu berri bat bultzatzeko beharraz kontziente izanik, Eresargi Abesbatzako Zuzendaritza Batzordeak gazte eta haurrekin osatutako egitasmo berri bat abian jartzea proposatu zuen 2013aren amaieran, taldea desagertu zenetik urte asko igaro ondoren. Izan ere, 2014an, Eresargi Txiki berriro hasi zen bidea egiten Ariel Cruz zuzendari kubatarraren eskutik, modu oso diskretuan.
Harrezkero, hainbat zuzendarik lagundu dute proiektua finkatzen, Miriam Lopezek eta Alberto Palacinek, besteak beste.
Zalantzarik gabe, proiektua sendotzen eta forma hartzen ari da Klara Mendizabal egungo zuzendariarekin; 2016an zuzendaritza hartu zuenetik, arrakasta handiz lortu du gazteak abesten ikasten joatea eta, aldi berean, gozatzea.
Gaur egun 30 abeslarik osatzen dute taldea. Amasan eta Villabonan ematen dituzten kontzertuez gain, jada ugariak dira bakarka zein beste talde batzuekin batera Donostian, Andoainen, Hondarribian edo Gasteizen eskaini dituzten saioak. Horrez gain, Gipuzkoako Abesbatzen Federazioak antolatzen dituen ikastaro eta jaialdietan ere parte hartzen dute.
Hasieran esan bezala, Eresargiren helburu nagusietako bat Villabonan abesbatza-musika indartzen jarraitzea da, eta aurretik dugun abeslari-harrobi bikaina ikusita, lortzen ari garela esan dezakegu.
